cuvee des Trollss bier van de maand September 2026 Delen

Ah ier ze, de fanatieke bierproevers.

Zin de batterietjes were ipgeloan? Goe congéetje had? Ouz oetje en short meugn were in de kasse. Wulder zin der gereit vworn.

En me vliegn derin met een bier ut Pipaix  van Brasserie Dubuisson. Un vaste weirde in het brouwersmilieu. Wist je dat die brouwerij oal 250 joar bestoat. Dat es oal 250 joar ervaringe é…Dus lat ous zeggn dan die gasten wetn wuk dan ze doen.

Een sprookskesachtig bier met een speciaal bjestje.

Cuvee des trolls, dad es ous bier van de moand. Een strogeel blond bier, ongefilterd met ne natuurlijke sluier.

Oje da proeft eie in de neuze fris wit en geel frut en toetsen van mandarientjes, met in de smoake een perfecte balance tussn zjem en un hjel licht bitterke.  Vulmondig en ne skweune body voor een bier van 7 graden.

Oje die belevinge van Cuvée des Trolls  wok wil meemoaken, kom ton noa ouze winkel in Heule. We zin zelfs oale doage open over de noene, zelfs de zundag es team Pauwels ip t appèl van ten negenenoalf tot ten twoalvn. Of me bringn uwe bak thus. Wok online kund je bestellen via ouze Drinxitwebshop.

Binst de moand september est er een actie ip de Trollekes. Oje  3 flasselkes  kweupt eje jèn  vo niet. Zowel ip de Cuvée, ip de Low en ip de Rasta.

Ah ja, k zout biekans vergetn. Een culinair tipke. Eie oal ne kjè bouchotmosselkes greit gedoan met bier. Probeer mo ne kjè met een Trolleke. Garantie daje da top goa vindn.  

A la prochaine!